У лютаўскім нумары часопіса “Маладосць” вядомы беларускі празаік Расціслаў Бензярук папярэджвае моладзь пра наступствы кожнага ўчынка, зробленага ў жыцці. У аповесці “Бумеранг” ён раіць цікавіцца гісторыяй сваёй радзімы, памятаць “дзедаў запавет” ды заклікае жыць сумленна. Маладая аўтарка Ірына Зорка падзеліцца ўласнай душэўнай траўмай – эмацыйна напружаны аповед пра жыццё пасля смерці. А экспрэсіўная акварэль Соф’і Дзядзюк захопіць у палон гукаў, колераў і смакаў. Насычаны дэталямі свой метафарычна-вобразны малюнак яна прапануе адчуць фізічна.

Паэзія ў нумары прадстаўлена вершамі Зінаіды Дудзюк і Алены Котавай, сярод паэтаў-пачаткоўцаў – Марыля Буйна, Варвара Суравец, Віталія Глаз, Маргарыта Стрыевіч, Кацярына Мізерыя.

Эксклюзіў нумара – няскончанае апавяданне Уладзіміра Караткевіча “Сонца апошняга дня”. Друкуецца ўпершыню. Матэрыял падрыхтаваў Марат Азярэц.

У рубрыцы “Асоба” прапануем эсэ пра вядомага беларускага паэта, перакладчыка Уладзіміра Марука - да 70-годдзя з дня яго нараджэння. Узнёслае, прачулае і шчырае віншаванне бацьку напісала яго дачка – Вераніка Марук, якога яна ўспамінае з глыбокай пяшчотай і называе не інакш як “сціплы сябар”.