Вялікі блок сакавіцкага нумара будзе прысвечаны згадкам пра беларускага паэта і перакладчыка Міколу Мятліцкага - да 70-годдзя з дня яго нараджэння. Прачулыя ўспаміны сяброў і былых калег Уладзіміра Мазго і Віктара Шніпа; апошняе інтэрв’ю пісьменніка Алесю Бараноўскаму, якое друкуецца ўпершыню; а таксама неапублікаваныя вершы, падрыхтаваныя да друку жонкай Ірэнай.

Да глыбіні душы ўразяць чытача аўтабіяграфічныя рэфлексіі лаўрэата Нацыянальнай літаратурнай прэміі Людмілы Рублеўскай. Шчырыя, пяшчотныя, прачулыя ўспаміны пра родных і дзяцінства, ад якіх штохвіліны плачаш і  смяешся, адгукаюцца ў душы ўласнымі жыццёвымі гісторыямі і людзьмі, якія паўплывалі на наша сталенне і свядомасць ды якіх ужо няма побач…

Вядомы грамадскі дзеяч, доктар педагагічных навук Аляксандр Радзькоў раіць маладым людзям да любога выступлення сур’ёзна рыхтавацца. Свае парады ён выклаў у новай кнізе “Украпіны. Словы ў афіцыйныя, навуковыя і карпаратыўныя даклады, а таксама - для зместу бяседных і таварыскіх гутарак”. Увазе чытачоў прапануецца невялікі ўрывак з кнігі ў перакладзе на беларускую мову Алеся Карлюкевіча.